طيزي وكرسي البلاستيك – الفصل الثاني

ياريت تاخدو نفس عميق قبل ما تبدو في القراءة. انا اليوم بكتب لأني قرفان ومش طايق الارض اللي بمشي عليها. وازا انت من الناس المتعصبين ياريت توقف لعند هنا وتسكر الصفحة.

بسم الله نبداً
طبعا الكل بعرف اني من سكان غزة وواحد من الناس اللي حظها في السفر “خرة” اسف عن الكلمة البذيئة اللي يمكن راح تتعودوا عليها في هادا الفصل لأنه انا وصلت معي لمرحلة لما بعد طفح الكيل وبعرفش ايش بكملوها
-نفس عميق جدا- هلقيت انا يا جماعة الخير زيي زي كتير من الشباب في غزة عمرنا ما طلعنا من غزة. انا شخصياً ومش مستحي أقولها، بعرفش شكل المعبر كيف ولا الطريق اله من وين. بعرفش كيف الطريق على ايرز وما بعرف شكله او شكل المنطقة المحيطة بإيرز والحمد لله صرت اعرفها من الفيديوهات اللي معبية النت عن الاحداث اللي صارت من كم يوم على الحدود بينا وبين الكلاب ولاد الكلاب.

انا يا جماعة الخير واحد من الناس الي بحب غزة “كبلد” بموت في التراب تبعها. بس يا جماعة الخير الاشي زاد عن حده كتير.الجو صار بخنق والناس بتخنق والتعليم زبالة والجامعات بتسواش كلية من ام ال ٨ شهور في اي مكان تاني في اوروبا او اميركا.
كل اشي في البلد خرة، كل اشي في البلد زفت وبخنق ومش نافع. الجو العام، الناس، الطقس، الاسعار اللي بقدرش عليها حدا. مش مكفي انه الجو بخنق والناس كل مالها بتصير بضينة وبتخنق لا وفش شغل كمان او بالأحرى عشان نكون واقعيين، ازا ملكاش واسطة لو توصل القمر وترجع األف مرة ما بتشتغل حتى تعمل شاي وقهوة في وزارة ولا في شركة من القطاع الخاص.

مش راح اقعد اعيط واقول قديش طار من ايدي منح وبعثات عشان انا من غزة او عشان اليهود زمان كانو يرجعونة بنفس الحجة اللي كتر ناس انرفضت عشانها “مرفوض امنيا، روخ ع دار خبيبي”
يا غزتي انا والله بحبك بس مش مكتوب ولا في اي كتاب مقدس اللي عماله بصير. اي انخنقنا. هدلاك نازلين يتخانقو زي الضراير واحنا بينا وبين بعض بنقول بدنا وبدناش وعاملين زي الشحات اللي برضاش غير يقبض بالدولار. أي لايمتا عاد مع هالناس اللي مش كاينة تستوعب انه الدنيا حدودها ابعد من هيك؟

ناس الها واسطة بتشتغل وبتروح وبتيجي وبتعمل وبتسوي وبتطلع ابصر وين كل صيف غير الصلاحيات والرفاهية اللي بعيش فيها. وناس زي حالاتي ملهاش غير رب العباد ماكلة خرة ومش ملاقية شغل ولا ملاقية حتى حد يتطلع في خلقها ولا يقلها وين انتي.
انا لو عندي واسطة كان انا بشتغل مش عارف وين وعندي بيت ملك وسيارة وبطلع وبنزل بكل أريحية ولا بفكر في ايش اشي تاني غير اني كيف احقق اكبر راحة ورفاهية ممكنة ويلعن ابو المصاري، مهو انا راتبي ٢٠٠٠ دولار في الشهر ولا اكتر ايش راح تفرق معي لما ابعترلي راتب شهر عشان ارفه عن حالي شوية؟

يعني يا جماعة الخير والله العظيم البلد صارت العيشة فيها لا تطاق بسبب الاقلية المترفهة بشكل خيالي في البلد. وفوق كل هادا بقلك الوضع الاقتصادي تبع البلد خرة وفش رواتب وفش بعرفش ايش. ها من وين كل هالسيارات والفلل اللي كل يوم بتطلع جديد في الشارع وعمال بنسمع اسماء سيارات اشكال الوان وسيارات تانية بنعرفهاش غير من كتر ما بنشوف صورها عالنت بنلاقيها مارقة من جنبنا او صافة جنب الرصيف؟

يا سيدي بلاش، من وين الناس بتجيب مصاري كل يوم تروح عالديرة واللايت هاوس؟ من وين الناس بتجيب مصاري كتير عشان تبعتر بالراحة ٢٠٠ شيكل على وجبة عشا ونفسين شيشة في مكان راقي بأسعار فوق السياحية؟ الوالد عنده بير بترول عالسطح؟ ولا كاين اله نص ابيار نفط وحدة من دول الخليج؟ اي مش معقولة يازلمة انت التاني من وين جايب كل هالمصاري؟

اقلكم باختصار؟
يلعن ابو البلد على ابو العيشة اللي في البلد. يلعن ابو العيشة كلها بشكل عام، يلعن ابو الناس ويلعن ابو الشغل. يلعن ابو الاحتكار ويلعن ابو البطالة. يلعن ابو الكاز والبنزين والغاز. يلعن ابو الكهربا اللي بتشرف بعد ما نروح ننخمد ننام. يلعن ابو الشوارع المكسرة. يلعن ابو الجو الزبالة تبع البلد. يلعن ابو فلان وفلان. ويلعن ابو الانفاق كلها بكندرة

خلصت جامعتك بامان وسلام ويلا يا حبيبي نفرح فيك ونجوزك. يمة انا بشتغلش من وين بدي اصرف على بنت العالم؟ ولا بدك اروح اخد مصاري من ابويا كل شوية هات واعطيني ويحملني مية جميلة على كل أغورة بعطيني ياها؟
اي يمة يا حبييبي بدنا نفرح فيك ونشوفك مبسوط ونشوف ولادك بجرو حوليك. ايش يمة هم ولادي كاينين يشتغلو طور ساقية؟
اي انت بس خلينا نشوفلك بنت حلال وبعدين بفرجها ربك. انت بس تتجوز بتنفتح البواب كلها قدامك. تنفتح البواب يمة؟ والله غير تنفتح ….. قال تنفتح البواب. مين سمعك يمة، مهو البواب هادي مسكرة بخيط

واللي بقهر في الموضوع فوق كل هادا وهادا قلهم اه شوفولي بنت حلال واخطبولي. بتروح لأبو المحروسة بشوفك بتشوفه. بسألك ايش بتشتغل يا عمي؟ والله لسا بدور على شغل. طيب من وين بدك تصرف على بنتي؟ بدك تاخد مصروفك من ابوك؟ متأسف يا عمي هي الباب وراك. طبعا الحوار هادا بصير دااااااااااااااااايما وصار مع ناس كتير وهادا السيناريو محترم جدا على فكرة

تعال احكي لاهلك طيب وازا ابوها قال وسأل ايش بشتغل؟ بقولولك لا بسألش. طيب انتو ايش عرفكم؟ ولا نطلع بسواد الوجه والخيبة قدام العالم والناس؟
طيب افرضو البواب تبعتكم هادي ما انفتحتش؟ ايش راح يصير؟ اقعد اشحت؟ ولا استنا فاعلين الخير يجيبولي اواعي بالة واكل خربان كمساعدات؟

يازلمة عفو عن سماي عاد بلا قرف

Did you like this? Share it:

About Nader Elkhuzundar

Nader Elkhuzundar is a commentator on Palestinian affairs and Co-founder of Beyond Compromise (www.beyondcompromise.com). Elkhuzundar occasionally freelances for The Guardian, International Business Times, and others. He's a social media enthusiast and tech savvy with particular interest in new technologies and analytics, and enjoys reading over Arabic coffee and dark chocolate.
This entry was posted in طيزي وكرسي البلاستيك and tagged , , , , , , , , , , , , , , , , , , , , , , , . Bookmark the permalink.

8 Responses to طيزي وكرسي البلاستيك – الفصل الثاني

  1. mahmoud says:

    الي عنده باب ربك عنده مليون باب وع فكره انا نفسي من اللحظة هاي ارجع على غزة بس قولتاك بقدر اطلع انا كنت هناك ايام العز في 2004 وما قدرت اطلع الا بعد 6 شهور واخوي بعد 8 شهور اخواتي اتزوجوا وخلفوا ولادهم في المدارس وانا ما بعرفهم الا بركت النت انا سمعت في مثل في غزة بنقال في احدالمطاعم بعد احداث الانقلاب ( توتو راحت سوس اجت ) يمكن المثل حرفيا مزبوط بس انت فهمت المقصود ويعلم الله مش عارف شو اقلك بس اهل غزة كلهم بدفوعوا الضريبة بس شكلوا الضريبة الضعف على جوا البلد

  2. Yaz says:

    بصراحة أفحمتني ..

  3. palestine says:

    ههههههههههههههه قلبت المواجع

  4. الله يكون بعونك ويفتح كل البواب بوجهك ياارب الله يعين كل اهل غزة ويصبرهم انت بتقدر تطلع بس الشغلة بدها مصاري والواحد بتكون حالتو عالله الله يفتح كل البواب بوجهك ياااااااااارب وانا بدعيلك بالاقصى الله يكون بعونك

  5. الله يكون بعونك يارب بنفع تدخل عالقدس بس الشغلة بدها مصاري وانتا حالتك عالله الله يفتح البواب بوجهك

  6. وانا بس اروح عالاقصى بدعيلك

Leave a Reply

Your email address will not be published. Required fields are marked *